పాడేరు, జూలై 19: అల్లూరి సీతారామరాజు జిల్లా పాడేరు మరోసారి గిరిజన హక్కుల ఉద్యమాలకు కేంద్రంగా మారింది. గిరిజన ప్రాంతాల్లో స్థానిక గిరిజన యువతకు ఉపాధ్యాయ ఉద్యోగాల్లో రక్షణ కల్పించిన GO Ms.No.3 పునరుద్ధరణ కోసం గిరిజన సంఘాలు, విద్యార్థి సంఘాలు, నిరుద్యోగ యువత, ప్రజాసంఘాలు పెద్ద ఎత్తున ఆందోళనలు చేపడుతున్నాయి.
2000 జనవరి 10న అప్పటి ఆంధ్రప్రదేశ్ ప్రభుత్వం జారీ చేసిన ఈ జీవో ప్రకారం షెడ్యూల్డ్ ఏరియాల్లోని ప్రభుత్వ, జిల్లా పరిషత్, మండల పరిషత్ పాఠశాలల్లో ఉపాధ్యాయ పోస్టులను 100 శాతం స్థానిక షెడ్యూల్డ్ ట్రైబ్ (ఎస్టీ) అభ్యర్థులతోనే భర్తీ చేయాలని నిర్ణయించింది. గిరిజన ప్రాంతాల్లో స్థానిక భాష, సంస్కృతి తెలిసిన ఉపాధ్యాయులు ఉంటే విద్యా ప్రమాణాలు మెరుగుపడతాయని, గిరిజన యువతకు ఉపాధి అవకాశాలు పెరుగుతాయని, రాజ్యాంగంలోని ఐదో షెడ్యూల్ స్ఫూర్తి అమలవుతుందనే ఉద్దేశంతో ఈ జీవో తీసుకొచ్చారు.
అయితే దీనిని కొందరు గిరిజనేతర అభ్యర్థులు న్యాయస్థానంలో సవాలు చేయగా, దీర్ఘకాల న్యాయపోరాటం అనంతరం 2020 ఏప్రిల్లో సుప్రీంకోర్టు 100 శాతం రిజర్వేషన్ రాజ్యాంగ సూత్రాలకు విరుద్ధమని పేర్కొంటూ GO నెం.3ను రద్దు చేసింది. ఈ తీర్పు తర్వాత ఏజెన్సీ ప్రాంతాల్లో స్థానిక గిరిజన యువతకు ఉన్న ప్రత్యేక ఉద్యోగ రక్షణ తొలగిపోయిందని గిరిజన సంఘాలు ఆవేదన వ్యక్తం చేస్తున్నాయి.
స్థానిక భాష, జీవన విధానం తెలియని ఉపాధ్యాయుల నియామకాలతో గిరిజన విద్యార్థుల విద్యపై ప్రతికూల ప్రభావం పడుతోందని కూడా వారు చెబుతున్నారు. ఇదే నేపథ్యంలో ప్రస్తుతం పాడేరులో GO నెం.3 పునరుద్ధరణ లేదా సుప్రీంకోర్టు తీర్పుకు అనుగుణంగా గిరిజనులకు సమాన రక్షణ కల్పించే కొత్త చట్టం తీసుకురావాలని డిమాండ్ చేస్తూ ఆందోళనలు ఉధృతం చేశాయి.
ఎన్నికల సమయంలో గిరిజన హక్కుల పరిరక్షణపై ఇచ్చిన హామీలను ప్రభుత్వం నిలబెట్టుకోవాలని కోరుతున్న ఉద్యమకారులు, ర్యాలీలు, ధర్నాలు, నిరసన కార్యక్రమాల ద్వారా తమ స్వరం వినిపిస్తున్నారు. ఒకవైపు సుప్రీంకోర్టు తీర్పు, మరోవైపు గిరిజనుల ఉపాధి హక్కుల పరిరక్షణ అవసరం నేపథ్యంలో GO నెం.3 అంశం మరోసారి రాష్ట్ర రాజకీయాలు, పరిపాలన, రాజ్యాంగ పరిరక్షణలపై విస్తృత చర్చకు దారితీసింది.
ఇప్పుడు ప్రభుత్వం గిరిజనుల న్యాయమైన డిమాండ్లకు అనుగుణంగా రాజ్యాంగబద్ధమైన ప్రత్యామ్నాయ విధానాన్ని తీసుకువస్తుందా? లేక GO నెం.3 పునరుద్ధరణకు మార్గం వెతుకుతుందా? అన్నది రాష్ట్రవ్యాప్తంగా ఆసక్తికర చర్చగా మారింది.
