సేవా సేతు అభియాన్‌లో జాయింట్ కలెక్టర్ ఎస్. సేధు మాధవన్ పిలుపు
విజయనగరం, అక్టోబరు 12: ప్రధానమంత్రి సూర్యఘర్ పథకాన్ని ప్రతి ఒక్కరూ సద్వినియోగం చేసుకొని, సౌర విద్యుత్ ద్వారా విద్యుత్ బిల్లుల భారాన్ని తగ్గించుకోవాలని విజయనగరం జిల్లా జాయింట్ కలెక్టర్ ఎస్. సేధు మాధవన్ పిలుపునిచ్చారు. కలెక్టరేట్ ఆడిటోరియంలో సోమవారం సాయంత్రం నిర్వహించిన సేవా సేతు అభియాన్ కార్యక్రమంలో భాగంగా పీఎం సూర్యఘర్ పథకంపై ప్రజలకు అవగాహన కల్పించారు.
ఈ సందర్భంగా జాయింట్ కలెక్టర్ మాట్లాడుతూ, పీఎం సూర్యఘర్ పథకం వినియోగదారులకు ఎంతో ప్రయోజనకరమని పేర్కొన్నారు. ఈ పథకం ద్వారా ఇంటి పైకప్పుపై సోలార్ విద్యుత్ పరికరాలను ఏర్పాటు చేసుకోవడానికి కేంద్ర ప్రభుత్వం సబ్సిడీ అందిస్తోందని తెలిపారు. సౌర విద్యుత్ వినియోగంతో నెలవారీ విద్యుత్ ఖర్చులను గణనీయంగా తగ్గించుకోవచ్చని వివరించారు. కుటుంబాలకు ప్రయోజనం కలగడంతోపాటు, అదనపు విద్యుత్ ఉత్పత్తి ద్వారా దేశానికి కూడా మేలు జరుగుతుందని అన్నారు.
ఈ పథకం అమలులో విజయనగరం జిల్లా ముందంజలో ఉందని, మరింత ఎక్కువ మంది లబ్ధి పొందేలా ప్రజల్లో అవగాహన పెంచాలని అధికారులకు సూచించారు.
13,805 మంది నమోదు
ఏపీ తూర్పు ప్రాంత విద్యుత్ పంపిణీ సంస్థ పర్యవేక్షక ఇంజినీర్ ఎం. లక్ష్మణరావు మాట్లాడుతూ, జిల్లాలో పీఎం సూర్యఘర్ పథకం అమలు తీరును వివరించారు. సేవా సేతు అభియాన్‌లో భాగంగా జిల్లా వ్యాప్తంగా నెల రోజులపాటు అవగాహన కార్యక్రమాలు నిర్వహిస్తున్నట్లు తెలిపారు.
జిల్లాలో ఇప్పటివరకు సుమారు 13,805 మంది ఈ పథకం కోసం నమోదు చేసుకోగా, 10,673 మందికి పథకం ప్రయోజనాలు అందించినట్లు వెల్లడించారు. ఎస్సీ, ఎస్టీ లబ్ధిదారుల్లో 15,018 మందిని గుర్తించగా, వారిలో 8,994 మందికి ఇప్పటివరకు ప్రయోజనాలు అందించినట్లు పేర్కొన్నారు.
మండలాలు, నియోజకవర్గాల వారీగా లక్ష్యాలను నిర్దేశించుకొని, ప్రజలకు అవగాహన కల్పిస్తూ పథకం లక్ష్యాలను సాధించేందుకు కృషి చేస్తున్నామని తెలిపారు.
ఈ కార్యక్రమంలో ఎల్‌డీఎం మూర్తి, విద్యుత్ శాఖ అధికారులు, వినియోగదారుల సంఘాల ప్రతినిధులు, వెండార్లు, వినియోగదారులు పెద్ద సంఖ్యలో పాల్గొన్నారు.
