శృంగవరపుకోట: శృంగవరపుకోట పట్టణంలో 108 అడుగుల భారీ మట్టి వినాయక విగ్రహాన్ని ఏర్పాటు చేస్తుండటంతో భక్తుల్లో ఆసక్తి నెలకొంది. సుమారు 28 రోజుల పాటు విగ్రహాన్ని భక్తుల దర్శనార్థం ఉంచేలా భారీ ఏర్పాట్లు జరుగుతున్నాయి. అయితే ఈ భారీ ఆధ్యాత్మిక కార్యక్రమంలో భక్తులకు ఉచిత దర్శనం ఉంటుందా? లేక టికెట్ విధానం అమలు చేస్తారా? అనే చర్చ స్థానికంగా మొదలైంది.
శృంగవరపుకోటలో వినాయక చవితి వేడుకలకు ప్రత్యేకమైన సంప్రదాయం ఉంది. ఎన్నో సంవత్సరాలుగా ఎంత భారీ విగ్రహాన్ని ఏర్పాటు చేసినా భక్తులకు ఉచిత దర్శనం, ఉచిత ప్రసాదం, అన్నదానం వంటి కార్యక్రమాలు నిర్వహించడం ఆనవాయితీగా వస్తోంది. స్థానిక దాతలు, వ్యాపారులు, భక్తుల సహకారంతో విరాళాలు సేకరించి ఉత్సవాలను నిర్వహించడం పట్టణంలో కొనసాగుతున్న సంప్రదాయం.
అయితే ఈసారి 108 అడుగుల భారీ వినాయక విగ్రహాన్ని స్థానికులు కాకుండా బయటి ప్రాంతానికి చెందిన ప్రైవేటు వ్యక్తులు ఏర్పాటు చేస్తున్నారనే అంశం కారణంగా ప్రజల్లో పలు సందేహాలు వ్యక్తమవుతున్నాయి. ముఖ్యంగా ఇంత భారీ విగ్రహం ఏర్పాటు వెనుక ఉద్దేశం ఏమిటి? భక్తులకు దర్శనం పూర్తిగా ఉచితంగా కల్పిస్తారా? లేక టికెట్ల ద్వారా రుసుము వసూలు చేస్తారా? అనే ప్రశ్నలు వినిపిస్తున్నాయి.
భక్తి కార్యక్రమం అంటే భక్తుల కోసం… వ్యాపారం కోసం కాదనే అభిప్రాయం స్థానికంగా వ్యక్తమవుతోంది. 108 అడుగుల వినాయకుడిని దర్శించుకోవడానికి వచ్చే ప్రతి భక్తుడికి ఎటువంటి రుసుము లేకుండా దర్శన అవకాశం కల్పిస్తే, ఈ కార్యక్రమానికి మరింత ఆధ్యాత్మిక గౌరవం లభిస్తుందని పలువురు అభిప్రాయపడుతున్నారు.
అదే సమయంలో దర్శనం పేరుతో టికెట్ కౌంటర్లు ఏర్పాటు చేసి డబ్బులు వసూలు చేస్తే మాత్రం వినాయక చవితి వంటి భక్తి కార్యక్రమాన్ని వ్యాపార దృక్పథంతో నిర్వహిస్తున్నారనే తప్పుడు సంకేతం ప్రజల్లోకి వెళ్లే అవకాశం ఉందని స్థానిక వ్యాపార వర్గాల్లో చర్చ జరుగుతోంది.
ఇప్పటికే పట్టణంలోని వ్యాపారులు వివిధ పండుగలు, ఆధ్యాత్మిక కార్యక్రమాల పేరుతో తరచూ విరాళాలు ఇవ్వాల్సి వస్తోందని అసంతృప్తి వ్యక్తం చేస్తున్న పరిస్థితి ఉంది. సాయిబాబా గురుపౌర్ణమి, దేవీ నవరాత్రులు, వినాయక చవితి, దారా గంగమ్మ పండుగ తదితర కార్యక్రమాల సందర్భంగా విరాళాల కోసం వ్యాపారులను సంప్రదించడం జరుగుతుండటంతో, ప్రతి పండుగకు వ్యాపారులపైనే ఆర్థిక భారం పడకూడదనే అభిప్రాయం కూడా వినిపిస్తోంది.
భక్తి ఉంటే… ఉచిత దర్శనమే మేలు
108 అడుగుల వినాయక విగ్రహం ఏర్పాటు చేయడం నిజంగా ఆధ్యాత్మిక కార్యక్రమమైతే, స్థానికుల సంప్రదాయాన్ని గౌరవిస్తూ అందరికీ ఉచిత దర్శనం, ఉచిత ప్రసాదం, సాధ్యమైన మేరకు అన్నదానం ఏర్పాటు చేయాలని భక్తులు కోరుతున్నారు.
భారీ విగ్రహం ఏర్పాటు చేయడం ఎంత గొప్ప విషయమో, దాని వెనుక ఉన్న సేవా భావనను కాపాడటం అంతకంటే గొప్ప విషయం. వినాయకుడి దర్శనం కోసం వచ్చే సామాన్య భక్తుడికి డబ్బు అడ్డంకిగా మారకుండా చూడటం ద్వారా నిర్వాహకులు ప్రజల మనసుల్లో మరింత స్థానం సంపాదించవచ్చు.
వినాయకుడు భక్తులందరివాడు… దర్శనం మాత్రం డబ్బున్నవారికే పరిమితం కాకూడదు.
భక్తి పేరుతో వ్యాపారం కాదు… సేవా భావంతో ఉత్సవం సాగితేనే 108 అడుగుల వినాయకుడి వైభవానికి నిజమైన అర్థం ఉంటుందనే అభిప్రాయం స్థానికంగా బలంగా వినిపిస్తోంది.
అయితే నిర్వాహకులు ఉచిత దర్శనం, ప్రసాదం, అన్నదానం విషయంలో తమ నిర్ణయాన్ని ముందుగానే స్పష్టం చేస్తే భక్తుల్లో నెలకొన్న సందేహాలకు తెరపడే అవకాశం ఉంది.
